LEGAZPI CITY – Mahigot na kinondena kan grupo nin mga paraooma an speech ni Presidente Ferdinand Marcos Jr. sa saiyang ikaapat na State of the Nation address na dae nakakaapektar sa mga pararooma an 20 pesos per kilo rice program kan gobierno.
Segun ki Bantay Bigas Spokesperson Cathy Estavillo sa intrevista kan Bombo Radyo Legazpi na siisay an nagsurat kan sinabi kan Presidente huli ta harayo ini sa reyalidad huli ta inabot ki tulong taon bago maibarewas an programang diit man sana an naaabot asin nakaka-aprobitsar.
Dapat hiniling suboot kan nagsurat na dae man naibaba kan administrasyon an numero kan mga pamilyang pilipino na dae na sinda nakakamate nin gutom maski nakabakal na nin 20 pesos na bagas.
Dakulang injustice an nangyari sa mga paraooma sa pagpapabakal kan bente pesos na bagas huli ginamit kan mga traders an naunambitang programa nganing baraton an mga paroy kan mga paraooma.
Pigtaram pa kaini na dae dapat ipag-omaw kan presidente an saiyang programa huli ta kadaklan sa mga nasa laylayan an nagpipilang amay sa mga kadiwa centers nganing makabakal sana kan nasabing bagas.
Bago magpatindog nin kadakol na kadiwa centers an syertuhon muna suboot an pagpapakusog kan lokal na produksyon huli ta warang binanggit an Presidente na pupunduhon na an pag-iimport nin bagas asin iba pang pangenot na pagkaon.
Dakulon man na mga pauru-utrong promesa an presidente na pauru-utro man sanang napapako arug na sana kan pagpugo sa mga rice smugglers, manipulators asin traders huli ta maski ngonian an warang napapanimbag na mga indibidwal o grupo an administrasyon.
Pagdoon pa ni Estavillo na bako bastante an P113 Billion na budget nganing pakusugon an programa kan Department of Agriculture huli ta dae man kaini sinabay an pagbabarewas nin supports subsidies sa mga paraooma na labing naapektaran kan magkakasunod na bagyo asin habagat.
