LEGAZPI CITY- Ipighayag kan Commission on Elections (COMELEC) na malabo ng magkaigwa pa nin extension para sa voters registration na nakatalaan ng matapos ngunyang Setembre 30.
Sa ibong ini kan mga pangapudan kan Kamara asin Senado na pagpapalawig kan registration hasta sa Oktubre 31 nganing matawanan nin tyansa an mga naapektaran kan restrictions katakod kan COVID 19 pandemic.
Sa intrevista kan Bombo Radyo Legazpi kay Atty. Maria Aurea Bo-Bubao an Provincial Election Supervisor kan COMELEC Albay, dae pa man napag-uulayan sa ngunyan kan komisyon an posibilidad nin pagpapalawig kan pagpaparehistro lalo pang nasa duwang taon naman ining pigtatao kan COMELEC.
Dagdag pa suboot na kadakol pang kaipohan na gibohong preparasyon an komisyon para man sa pagpupuon na sa masunod na bulan kan filing kan certificate of candidacy asin para sa mismong aldaw nin pirilian.
Huli digdi, pangapudan ni Bunao sa mga bagong botante asin tolong beses ng dae nakaboto na magpasiring na sa saindang mga opisina nganing makapagparehistro asin makasabay sa pag-ilihir nin mga bagong opisyal kan nasyun sa 2022 national elections.
Napag-araman na nganing mas dakol pang tawo an maserbisyohan bukas na an opisina kan COMELEC tuyong aldaw nin Sabado mantang pinalawig pa an pagtataong serbisyo nin hasta sa alas 7 nin banggi.
