LEGAZPI CITY- Pigtutubudang nasa 20 katawo pa an natabunan asin padagos na pinaghahanap ngonian kan mga emergency workers sa Italy makalihis an pagrumpag kan Morandi motorway sa Genoa City.
Pagheheras ni Bombo International Correspondent Nelia Tanguilig, tubong La Union asin nagtatrabahong nurse sa Ospedale San Martino sa Genova sa Bombo Radyo Legazpi, nagtetenir pa sa government hospital an 16 katawo na nasa kritikal na kondisyon mantang anom an stable na an kamugtakan alagad nasa emergency room pa man giraray.
Segun ki Tanguilig, anas turista an mga ini na hale sa France, Romania asin Albania na naglamag kan departure kan barko sa Genoa port na pasiring sa ibang European countries kan mangyari an insidente.
Mientras tanto, ipigkokonsiderar ni Tanguilig na “miracle” asin garing pagsasalbar kan Diyos sa aksidente an pagfile kan sick leave sa mismong aldaw kan collapse.
Sa 20 taon na pagtatrabaho sa lugar, aro-aldaw ining nag-aagi sa motorway lunad an pagsadiring behikulo sa kaparehong oras man kan pagbagsak kan tulay.
Napag-araman na dinara an mga nairido sa “bridge collapse” sa Ospedale Villa Sassi asin sa pinagtatrabauhang ospital ni Tanguilig.
Magigirumduman na Agosto 14 bandang alas-11:00 nin udto, oras sa Italya kan marumpag an 200 metrong parte kan tulay na nagresulta sa pagkagadan kan labi sa 30 katao asin dakol an nairido makalihis mahulog an mga behikulo sa taas na 45 metro.
