LEGAZPI CITY – Nag- abiso an dating agriculture secretary sa Department of Agriculture na luway luwayan sana an pagkundusir nin mga trials para sa bakuna kontra African Swine Fever.
Katakod ini kan pagpatanid kan World Organization for Animal Health (WOAH) sa mga nasyon na dae maggamit nin substandard na bakuna kontra sa ASF ngane na maprebintaran an nasambitang helang.
Segun kay Leonardo Montemayor sa intrevista kan Bombo Radyo Legazpi na importanteng maobserbaran asin masunod an istriktong proseso na ipiglatag kan World Organization for Animal Health katakod kan paggamit nin bakuna kontra sa ASF.
Hasta sa ngunian, wara pa kaya na proven and tested na bakuna sa Pilipinas kontra digdi.
Mientrastanto, segun pa sa dating opisyal na kaipuhan pag-adalan nin marhay an mga bakuna na hali sa ibang nasyon antes an commercial distribution.
Kinakaipuhan man na magkaigwa nin product registration an mga bakuna gikan sa Food and Drug Administration.
Abiso kaini na sa ngunian na wara pang aprobadong bakuna kontra ASF kaya kinakaipuhan na ipadagos an istriktong biosecurity measures asin dae pwedisir na maglaog nin orig sa mga apektadong lugar ngane na maibitaran an paglakop kan nasambitang helang.
