Papautangon kan European Union an Ukraine nin nasa €35 billion o $39 billion kasunod kan napagkasunduan kan Group of seven nations.
Segun ki European Commission President Ursula von der Leyen na kasabay kan padags na pagsakyada kan Russia, nangangaipo man an Ukraine nin padagos na suporta kan European Union.
Kumpiyansa man an opisyal na maitatao an nasabing loan sa Ukraine sa urog na madaling panahon kasabay kan press conference kaibanan si Ukrainian President Volodymyr Zelensky sa Kyiv.
Tinawan man kan opisyal nin poderi si Zelensky na magdesisyon kun papano gagamiton an nasabing pondo ngani na madepensaran an nacion kontra sa Russia.
Pinaglalaoman na maitatao an pondo sa Ukraine antes matapos an presenteng taon.
Marurumduman na kan Hunyo, nagkasundo an Group of Seven, na kumpwesto kan pinakadarakulang ekonomiya sa kinaban, na magtao nin loan na nasa $50 billion para sa Ukraine gamit an ganansya hali sa mga assets kan Russia.
