LEGAZPI CITY — (Update) Nakatalaan na isairarom sa drug test an estudyante na nadakupan nin pigtutubudan na shabu na ilulusot kuta pasiring sa laog kan Albay Provincial Jail.
Sa intrevista kan Bombo Radyo Legazpi sa investigator-on-case na si SPO1 Jerson Rentosa, kaipuhan na magpa-drug test kan suspek na si Michael Manrique 20-anyos maski pa pignigaran na may kinaaraman ini sa iligal na droga na nakalaog sa sarong cupcake.
Pinag-aadalan naman ngonian kan pulisya an background kan suspek tangarig na makaguno nin impormasyon dapit digdi.
Bako man kumbinsido si Rentosa na warang aram si Manrique dapit sa dara kaining iligal na droga huli ta magkakapareho sana suboot an reaksyon asin istilo kan kadaklan sa mga drug personalities kun nadakop kan mga otoridad.
Nakatalaan man na isumiter sa crime laboratory an nakumpiskar na item para sa isasagibong mga test.
Mientras tanto, ipighahanda na man an kasong pagbayolar sa Republic Act 9165 o Comprehensive Dangerous Drugs Act of 2002 na isasangat kontra sa suspek.
