LEGAZPI CITY- Nagkondusir na nin aksyon an mga otoridad dapit sa agrangay kan sarong pasahero na dae suboot pagpapalunad saiya kan pampasaherong UV Express sa Legazpi terminal.
Segun ki Land Transportation Franchising and Regulatory Board Bicol Director Joel Defeo sa intrevista kan Bombo Radyo Legazpi na ipinaapod na niya an nagrereklamong pasahero gani na personal ining makaolay.
Magin an operator kan nai-post na UV express an pinaluwasan na man nin show cause order asin nakatalaan na makaolay sa Oktubre 9.
Sa siring na paagi, naglalaom an opisyal na mas matatawan nin kalinawan an isyu urog pang nakaguno na ini nin manlain lain na reaksyon hali sa publiko.
Segun ki Defeo na kinakaipuhan na madangog an duwang lado ngani na maresolberan an isyu.
Inasegurar man kan opisyal na matatawan nin penalidad kun siisay an may sala sa insidente asin kun igwang mahiling na paninimbagan sa anuman na lado.
