LEGAZPI CITY – Pig-aaram pa sa presente kan kapulisan kun pira an kantidad na aabuton kan danyos na iwinalat sa dump truck na pinasabog sa Brgy Gapo, Daraga, Albay.
Napag-araman na pagsadiri ini kan E.M. Cuerpo, Inc. na saro sa mga contractor kan ipigtitindog na Bicol International Airport (BIA) sa banwaan.
Sa nagunong impormasyon kan Bombo Radyo Legazpi hali sa Daraga Municipal Police, pigsasabing ikinaag kan mga suspek an improvised explosive device (IED) sa enotang parte kan behikulo.
Pigtutubudang mga rebeldeng New People’s Army (NPA) man an nasa likod kan insidente.
Dagos-dagos man giraray an ipigsasagibong pag-iimbestigar kan pulisya.
Mientras tanto segun pa sa Daraga PNP, negatibo an enot nang napabaretang pagsakyada asin harassment sa mga miembro kan Philippine Army sa Brgy. Alobo.
Tulos man na ipinagsugo kan kapulisan asin counterpart unit sa Philippine Army an pagkakaag nin checkpoint tangarig na madakop an mga responsable sa insidente.
