LEGAZPI CITY- Kumpiyansa an Provincial Government of Albay katabang an Philippine Sports Commission (PSC) asin Bicol University (BU) na magiging matrayumpo an resulta kan isasagibong enot na sports summit para sa mga local government units, eskwelahan, kolehiyo asin unibersidad na gaganapon sa Albay Astrodome asin BU grounds sa maabot na Abril 10 hasta 14, 2018.
Kaibanan sa mga nakalinyadang aktibidades an duwang aldaw na sports consultative meeting asin apat na aldaw naman na grassroots coaching asin officiating course sa basketball, volleyball, baseball, athletics, football asin boxing.
Bilog man an suportang itinao ni Governor Al Francis Bichara para sa aktibidad na bisto man na mahilig sa sports mantang ‘hands-on’ man ini sa planning stage.
Tinawang-duon pa kan gobernador an pagsimbag sa mga pangangaipo kan mga parakawat sa provincia partikular na an mga jovenes tangarig na magtalubo pa an kaaraman sa kinahuhumalingang kawat.
Obheto man sa nasabing summit an pagproduce kan world-class athletes na magigin representante kan Albay sa national competitions magin sa international games.
