LEGAZPI CITY — (Update) Labi an pagmundo ngonian kan mga suldados sa provincia kan Sorsogon sa nangyaring pagkagadan kan duwang miyembro kan 31st IB asin pagkairido nin pitong iba pa.
Ini makalihis an nangyaring enkwentro sa pagultangan kan puersa kan gobierno asin mga miembro kan rebeldeng New People’s Army (NPA) sa Brgy. Casili, Gubat, Sorsogon.
Sa intrevista kan Bombo Radyo Legazpi ki 9th ID Public Affairs Office chief Capt. Randy Llunar, binisto kaini an mga nagadan na sinda Corporal Eugene Bercacio asin 2nd Lt. Lee Trimidal na napag-araman na kakagraduar pa sana sa training.
Pighihiling man kan opisyal na dakol an numero kan mga kalaban asin bako pa sierto sa ngonian kun igwang nagadan sa lado kan mga rebelde alagad igwang nahiling na mga bakas nin dugo sa pinangyarihan kan bakbakan.
Nagtutubod man an opisyal na planado an nangyaring engkwentro huli ta aram suboot kan mga kalaban an hiro kan mga suldados asin pwedesir na mataram na parte ini kan saindang tactical offensive makalihis an magkakasunod na pagkalagas sa lado kan mga NPA.
Mientrastanto, padagos man ngunyan na pigmo-monitor an kondisyon kan mga nalugadan na suladados kun sain an nagkapirang kritikal an kondisyon an ipiglipat sa ciudad kan Legazpi ngani na mas matawanan nin dugang na medikal na asistensya.
Katakod kaini, sienerto kan opisyal na magpapadagos an mga militar sa pag-perform kan mandato na protehiran an mga ciudadano.
