LEGAZPI CITY — Dae nakadulag sa isinagibong buy-bust operation an sarong empleyado kan Department of Education (DepEd) na isinagibo kan mga otoridad sa 2nd Gate, Our Lady’s Village Pangpang, syudad kan Sorsogon.
Binisto kan pulisya an nadakop na suspek na si Jeric Zacarias Cadag, 46-anyos na empleyado kan DepEd Sorsogon City.
Sarong agent kan mga pulis an nagsagin-sagin na buyer asin naka-transaksyon ni Cadag kun sain pinabakalan nya ini nin sarong pakete nin pigtutubudang shabu karibay an kwartang ginamit bilang buy-bust money.
Makalihis an nangyaring positibong transaksyon sa suspek, tulos ining pinosasan asin isinagibo an search.
Kakahampangon ni Cadag an kasong pagbalgar sa RA 9165 o an Comprehensive Dangerous Drugs Act of 2002.
Ini na an panduwang matrayumpong buy-bust operation na ikinundusir sa Barangay Pangpang kun sain an enot, iyo an kontra sa sarong Overseas Filipino Worker (OFW) na nakuahan nin tulong pakete nin shabu.
Katakod kaini, baad mabawi an enot nang deklarasyon na “drug-cleared” na an nasambitan na syudad.
