LEGAZPI CITY — Padagos suboot an pigkokondusir na monitoring kan Environmental Management Bureau-Department of Environment and Natural Resources (EMB-DENR) sa anom na local government units (LGUs) sa saindang pag-rehabilitate kan ipinasarang dump site.
Segun ki Bombet Lita, Operation Section Officer kan EMB, nagtatao sinda nin feedback sa environmental ombudsman kada tulong bulan kasabay kan isinumiteng state closure and rehabilitation plan kan mga LGUs.
Matatapos man suboot an saindang monitoring kun matatapos naman an pag-rehabilitate kan open dump sites kun saen kun dae man maibalik sa dati, mas maray suboot na maging presentable man an binayaan na dump site.
Segun pa ki Lita, sinabi na kan ombudsman na dae na mapadara sa EMB nin notice dapit sa verdict kundi direkta na sa concerned LGUs alagad enkasong may kasuhan man, makakaresibe an EMB nin subpoena bilang witness sa kaso.
Dugang pa kan opisyal, diretso suboot an pagkaso alagad nakadepende an penalidad sa pagsunod kan LGUs sa isinumiteng timeline kan rehabilitation.
Aminado man si Lita na nadidifisilan an mga LGUs na mag-comply sa lakdang huli sa kawaran nin pondo.
