LEGAZPI CITY- Nahulog sa salog an sarong puting elf truck sa banwaan kan Viga, Catanduanes makalihis na madara sa pagrasay kan daga sa parte kan Brgy. Sagrada.
Sa ekslusibong intrevista kan Bombo Radyo Legazpi ki PS/Insp. Dexter Panganiban, hepe kan Viga Municipal Police, pigmamanehar ni Gerald Tabor, 39-anyos an nasabing behikulo na igwang plakang RNJ 213 kaibanan an pahinanteng si Jesus Olat, 52-anyos asin Alvin Obosa, 39-anyos sa Viga-Virac circumferential road kan mangyari an insidente.
Nalubog pa an nasabing behikulo sa tubig alagad dakulang pasasalamat kan hepe na dae man nauli sa mas malala pang problema an nangyari.
Pinasa kaya kan drayber an bintana sa walang porsyon kan truck tangarig na makahale sinda sa behikulo asin dae malunod.
Nagsapar man nin minor na lugad an mga ini na pigbubulong na ngonian sa ospital.
Mientras tanto, nairehistro man an lagpas-tawong baha sa pagsupay kan spillway sa Brgy. San Isidro kasubagong aga kasabay an nagkapira pang tinampo sa San Vicente, Sitio Small Viga asin Brgy. Peñafrancia na passable na man sa ngonian.
Nangyari an mga nasabing insidente huli naman sa namatean na makusog na pag-uran sa nasabing provincia.
