LEGAZPI CITY- Nahiling kan sarong election watchdog an trend kan maribok na kampanya ngunyan na taon.
Ini an sa tahaw kan nagpapadagos na campaign period sa nasyunal asin lokal na mga posisyon.
Segun ki Kontra Dara Convenor Prof. Danilo Arao sa intrevista kan Bombo Radyo Legazpi na nadiskubre man an talamak na manlain lain na klase kan porma nin pandadaya.
Ini afuera para sa nangyaring mga premature campaigning sa nakalihis na mga bulan.
Paliwanag kan opisyal na mantang paparani an pirilian, mas nagbubulos man an dakulang kantidad nin kwarta kaibanan na an paggamit kan nagkapirang personalidad sa mga ayuda kan gobierno.
Huli digdi, sinabi ni Arao na dapat na mas magin agresibo an Commission on Elections sa pagpapataw nin padusa sa mga maaydentipikaran na imbwelto sa pandadara asin vote buying.
Importante man suboot na mabantayan an negative campaigning na nagpapalakop nin pekeng impormasyon.
