LEGAZPI CITY- Nasasabutan kan sarong election watchdog na wara pang poder an Commission on Elections sa mga nagsasamantala sa holiday season para sa amay na vote buying asin darakulang tarpaulin kan mga politiko.
Segun ki Kontra Daya Convenor Danilo Arao sa intrevista kan Bombo Radyo Legazpi na maski pa bako pa election campaign, sala an pigigibo kan nagkapirang mga kandidato na nagtatao nin manlain lain na bagay asin regalo ngani sana na makuwa an boto kan publiko.
Katakod kaini, pinayuhan kan opiyal na an mga botante na mismo an dapat na maghiro asin magin wais na dae na ipagboto an mga abusadong personalidad.
Pinayuhan pa kan grupo an Commission on Elections na ipaapod an mga imbweltong personalidad asin pagpaliwanagon an mga ini sa motibo ngani na ma-expose an tunay na intensyon.
Sa siring na paagi, wara man na mababayolar na anuman na ley an nasabing komisyon.
Dugang pa ni Arao na kinakaipuhan na linawon man an depinisyon kan kandidato na magpupuon sa pagsusunad nin certificate of candidacy asin dapat na magsunod an mga ini sa mga rules sa pangangampanya asin mapakusog an ley na pagpapanimbag sa mga imbwelto sa early campaigning.
Paliwanag kaini na kinakaipuhan namalinawan an ley ngani na dae maaabuso kan mga politiko an anuman na sitwasyon.
