LEGAZPI CITY – Nagpatanid an eleksyon watchdog na Legal Network For Truthful Elections o LENTE Philippines kontra sa mga deep fakes na posibleng magamit ngunyan na eleksyon.
An Deep Fake an mga video, audio o pictures o kombinasyon kaini na piggigibo sa paagi nin artificial intelligence.
Sa intrevista kan Bombo Radyo Legazpi kay Alexa Yadao an Junior Program Officer kan Legal Network For Truthful Elections o LENTE Philippines, haloy ng problema sa Pilipinas an mga naglalakop na salang impormasyon asin mga black propaganda tuyong panahon nin eleksyon.
Alagad mas magiging problema ini ngunyan huli sa pagluwas kan mga makabagong teknolohiya na katubod-tubod asin madali na sanang mapeke.
Ipigtaong ehemplo ni Yadao an nagluwas na deep fake kan audio ni Presidente Ferdinand Bongbong Marcos Jr. kung sain madadangog an boses kan opisyal na nag-aabiso sa mga miyembro kan Armed Forces of the Philippines na maghanda sa posibleng gera dara kan lalong naglalalang tensyon sa West Philippine Sea.
Alagad sa imbestigasyon kan mga otoridad, nadiskubre na bako man na totoo an audio asin gibu-gibo man sana na tuyong pinalakop sa social ngani na magdara nin salang impormasyon.
Ini an mawot na mapugolan kan grupo lalo na sa panahon kan eleksyon kung nuarin uso an mga pagpapalakop nin mararaot na impormasyon kontra sa mga kalaban sa politika.
Huli digdi, nangapudan an grupo sa mga Pilipino lalo na sa mga botante na aramon muna kung totoo o bako an mga maglalakop na bareta sa social media lalo na kung bako man hali sa mga lehitimong sources.
