Legazpi City- Kinundina kan Election watchdog na Kontra Daya an mga nanunutara na pagtataong ayuda na mga Politiko huli sa garu suboot ginigibong dalan an sitwasyon kan mga nasalanta sa pagsasagibo nin Pre-Mature o Early campaigning.
Sa intrevista kan Bombo Radyo Legazpi kay Prof. Danilo Arao, an Kontra Daya COnvenor, sa tahaw kan namamatian kan mga nasalanta kan bagyo ay nakailing nin oportunidad an mga ini para ipamidbid an saindang mga pangaran.
Nanutaran kaya an nagkapirang ayuda o bagas na ipinagtatao na igwang mga pandok asin pangaran kan mga politiko.
Namumundo man an opisyal sa padagos na talamak na pre-mature asin early campaigning sa nagkapirang mga lugar, nasalanta man o dae.
Segun pa kay Arao, dae pa mapugulan an arog kaining paagi kan mga politiko huli na man sa dae pangbatas na nagmamandato o nagbabawal sa early campaigning.
Mientras tanto sa ibong kan naunambitang sitwasyon, pinag-iinganyar man giraray kan opisyal an publiko na akseptaron an mga bagas o ayuda na ipinatatao huli na man ta an mga ibinakal sa mga ini ay hale man sana sa buwis kan namamanwaan.
