Makakalaban ni EJ Obiena an nagkapira sa mga pinakamatibay na atleta sa Pole Vaulters sa 2025 Mondo Classic na mangayayari sa IFU Arena sa Uppsala, Sweden, sa Huwebes, Marso 13.
Pangengenotan kan elite pole vaulters na si world record holder Mondo Duplantis an nasambit na kompetisyon.
Mientrastanto, ini na an huring indoor event ni Obiena bago an saiyang pagpreparar para sa outdoor season, kun saen makikilahok siya sa tulong kumpetisyon siring kan Asian Championships sa Gumi, South Korea; World Outdoor Championships sa Tokyo, Japan; asin Southeast Asian Games sa Bangkok, Thailand.
Naglalaom man si Obiena na makakakua pa nin saro pang pagkakataon ngani makapag-podium sa Mondo Classic, makalihis manggana nin bronze medal kan nakalihis na taon sa saiyang countback na may markang 5.91 meters.
An Mondo Classic pigkonsiderar na sarong importanteng okasyon bilang pagpreparar para sa World Indoor Championships na mangyayari sa Nanjing, China sa Marso 21 hanggang 23.
Alagad dae naglaog si Obiena sa World Indoor Championships huli ta dae niya nakua an 5.85-meter qualifying standard sa laog kan qualifying period.
Nin huli mas pinili niyang magpahingalo sa saiyang nasapong injury sa likod na nakua niya mantang nag-eehersisyo para sa Paris Olympics kan nakalihis na taon.
