LEGAZPI CITY-Nagpatanid an Second Congressional Commission on Education (EDCOM2) makalihis an pinakabagong surbey kan Department of Science and Technology–Food and Nutrition Research Institute na nagbuyagyag na padagos na halangkaw an numero kan kan mga kaakian na igwang malnutrisyon sa nacion.
Basado sa resulta kan 2025 Updating Survey, nasa 25.3 porsyento o saro sa apat na aki na limang taon pababa an edad, an nakakaeksperyensya nin stunting o maluway na pagtalubo huli sa kawaran nin tamang nutrisyon.
Segun sa EDCOM2, pigkokonsiderar ini na seryosong isyu sa salud kan publiko huli sa padagos na paglangkaw kan numero kan mga apektadong jovenes.
Urog pang ipinaliwanag kan komisyon na an epekto kan malnutrisyon bako sanang nahihiling sa pisikal na pagtalubo kan aki.
Kundi posible man ining makaapektar sa pagtalubo kan isip, kakayahan sa pag-adal, asin pagigin andam kan mga kaakian na maglaog sa eskwelahan.
Huli kaini, sinabi kan EDCOM2 na an mga problema sa edukasyon kan nacion nagpopoon dawa bago pa maglaog sa klasrum an sarong aki.
Ihinayag man kan survey na mas grabe an mga problema sa mga pobre asin madaling mabiktima na mga komunidad, kun saen mas dakol na kaakian an napapaatubang sa kakulangan sa kakanon asin maluyang nutrisyon.
