Nagpalakop an gobierno nin Ecuador nin nasa 75,000 na mga suldado sa apat na provincia kun sain igwang halangkaw na kariribukan.
Kasabay kaini an pagpapaotob nin curfew sa banggi bilang lakdang sa paglaban sa kriminalidad sa nacion.
Puon kaya kan magtukaw sa pwesyo kan 2023 si Ecuador President Daniel Noboa, nagin mahigot an paglaban kaini sa krimen na may kinaaraman sa iligal na droga
Alagad kan nakalihis na taon, nakapagrehistro nin dakol na mga insidente nin garadanan sa nacion.
An Ecuador kaya an nasa tahaw kan Colombia asin Peru na pigkokunsiderar na pinakadakulang producers nin cocaine.
