LEGAZPI CITY-Nagtutubod si dating International Criminal Court (ICC) Judge Raul Pangalangan na bastante an ebidensiyang iprinisentar kan prosecution ngani i-convict si dating Presidente Rodrigo Duterte.
Segun sa dating husgado asin dating nagserbing dean kan U.P. College of Law, matibay an mga ebidensiyang iprinisentar kan prosecution sa enot na aldaw kan pagdangog asin sinabi niyang bastante an mga ini ngani makumbinse an mga husgado kan ICC.
Bago pa an pagpoon kan pagdangog, piglalaoman suboot na ipresentar kan panel an saindang witness ngani ipahiling an merito kan saindang kaso.
Pigsaro-saro suboot kan mga prosecutor an nagkapirang espisipikong detalyes kan mga kasor pig-aakusar kay Duterte, kabale na an mga video clips na nagpapahiling kan mga nagin kontrobersyal na pahayag kan dating Presidente.
Dai man pigsasawarang bahala kan dating ICC judge angposibilidad na pighahanda asin pig-tipon pa kan panel an saindang pinakamakusog na ebidensiya para sa trial proper, enkaso man na mag-padagos pa an kaso poon sa confirmation stage.
Iprinisentar kan panel sa enot na aldaw kan confirmation hearing kan dating Presidente, an mga dating video kaini kun sain pig-aako niya an nagkapirang panggagadan asin iba pang kontrobersyal na kasuguan sa katahawan kan saiyang kampanya kontra iligal na droga.
Mientrastanto, segun man sa senior trial lawyer kan Office of the Prosecutor na si Julian Nicholls, na matibay an mga kapot na ebidensiya kan prosecution asin kaya suboot kan panel na ipakulong an dating Presidente, kun magdedesisyon an mga judge na ipadagos ini sagkod sa full trial.
