LEGAZPI CITY – Piglalaomang mas magigin marikas pa an pagtataong-servicio kan mga ahensya de gobierno sa mga kliyenteng pigsiserbisyuhan makalihis an pagsasaley kan Ease of Doing Business Act.
Sa ekslusibong intrevista kan Bombo Radyo Legazpi ki Civil Service Commission (CSC) Asst. Commissioner Ariel Ronquillo, pirmado naman an krinear na Implementing Rules and Regulations (IRR) para sa nasabing ley, katabang an Anti-Red Tape Authority (ARTA), CSC asin Department of Trade and Indsutry (DTI).
Magigin epektibo an ley 15 dias makalihis na maipublikar sa Official Gazette.
Sa irarom kan nasabing ley, posibleng matawanan nin penalidad an mga oficina na dae makapagtao nin tulong aldaw na palugit para sa simpleng transaksyon, pitong aldaw kun medyo dificil asin 20 dias na an pinakakomplikado.
Panlaban man suboot an nasabing ley sa fixing na pighihiling na urog pang nagpapahaloy sa mga transaksyon sa gobierno mantang obheto man na mabawasan an mga dugang na gastos.
Dugang pa ni Ronquillo na mas magigin komportable an pakikipag-transaksyon urog na kun sa paagi kan online mantang magigin kapaki-pakinabang man an ley.
Mientras tanto, bukas man an linyang 8888 sa pagsimbag sa mga reklamo hali sa mga naka-eksperyensya nin bako maray na servicio hale sa mga oficina kan gobierno.
