LEGAZPI CITY — Ibinida ni Senate Committee on Ways and Means chair Senator Sonny Angara an suboot dakulang itinalubo kan Public Health System sa Pilipinas sa tabang kan pondo na hale sa pagkakapasar kan Republic Act 10963 o SinTax Law kan 2012.
Segun ki Angara ‘earmarking’ an nakukuang revenues hale sa pinalangkaw na cigarette tax puon sa expected P30 billion kan naglobo sa P100 billion kan 2016 mientras na piglalaomang matalubo pa sa mga masunod na taon.
Katakod kaini, mapapagaan man an iisipon kan mga pobreng kahimanwa sa gastuson sa hospital fees urog na nangangahulugan an paglangkaw kan revenues nin dugang na coverage asin iaalokar na pondo sa PhilHealth premium.
Inomaw man kaini an mga esfuersos kan Department of Health asin PhilHealth sa pagbusol kan mga lakdang na pansalud.
Magigirumduman na kan nakaaging semana kan magbisita an nasabing senador sa Albay sa pagkokondusir kan public hearing para sa ipigbubusol na Universal Health Care bills kaibanan an iba pa miembro kan Senate Committee on Health and Demography sa pangengenotan ni Senator JV Ejercito.
