LEGAZPI CITY — Liwat na namang may nasita an personahes kan Sto. Domingo Municipal Police na duwang US citizen asin duwang Pinoy makalihis na madakop na nagkakawat sa laog kan 7-kilometer extended danger zone kan Bulkang Mayon sa Albay.
Segun ki Pol. S/Insp. Genevieve Oserin, hepe kan Sto. Domingo Municipal Police, naglaog an dae na pinangaranang US citizens sa Purok 1 Barangay Lidong na naaktuhang nagkakawat nin golf na nasa laog kan danger zone kaiba an duwang Pinoy.
Nagpirit pa suboot kan mga ini na miembro kan Legazpi Golf Club na tapuson an pagkawat alagad dae na ini tinugutan pa kan mga pulis na nagkokondusir nin choke point.
Nakiolay man an mga ini na dae na ipaabot pa ki Legazpi City Mayor Noel Rosal an pangyayari huli sa dadagitan suboot sinda sa pagbayolar sa kasuguan.
Dugang pa ni Oserin na nakakalusot man liwat an ibang bakasyunista huli sa may agihan o lusutan sa may Barangay Padang na sakop na kan Legazpi City.
Ngani man suboot na mapakusog an pagbabantay, makikipag-koordinar ini sa Legazpi City Police asin makikipag-olay man ki Mayor Rosal.
Ini na an pantulong beses na may nadakop na naglaog sa danger zone kun sain enot suboot an nag-picture na foreigner asin an duwang scientists na tinugutan kan Philippine Institute of Volcanology and Seismology (PHIVOLCS) ngani na magkua data katakod kan monitoring kan bulkan.
