LEGAZPI CITY- Kulungan an bagsak kan duwang drug personalities sa probinsya kan Masbate makalihis an matrayumpong operasyon na ipigkondusir kan Masbate Provincial Police Office sa banwaan kan Aroroy.
Sa magkasuway na anti-illegal drugs operation, arestado si Joemil Silva na Rank Number 2 sa Drug Personalities Provincial Priority Target sa harong kaini sa Brgy. Jaboyo-an mantang arestado man si Erwin Mendoza kan Brgy. Poblacion na Rank Number 28 sa nasambitan na listahan.
Narekober hali ki Silva an duwang plastic sachet na pinagtutubudan na shabu mantang tulong sachet man ki Mendoza kaibanan an nagkapira pang drug paraphernalia na nai-turn over na sa PNP Crime Laboratory para imbestigasyon.
Napag-araman na enot nang nagsurendir an mga ini sa pagpapaotob kan Oplan Tokhang kan nakalihis na taon alagad nagtetenir na aktibo sa kalakaran kan iligal na droga sa nasambitan na lugar.
Sa presente pighahanda na an kasong pagbalgar sa Section 12 kan Republic Act 9165 o Comprehensive Dangerous Drugs Act of 2002 na isasangat kontra sa mga ini.
Mientrastanto, pig-omaw man ni Masbate PNP Dir. PS/Supt. Froilan Elopre an mga operatiba kasabay kan promesa na dae mapundo an kapulisan sa pagkokundusir nin mga operasyon hasta sa dae nailalaag sa likod kan rehas an pinaka huring drug trafficker.
