LEGAZPI CITY — Parehong nagadan mientras na pigbubulong sa ospital an duwang drayber makalihis na magsapar nin mga seryosong lugad sa hawak sa nangyaring banggaan kan saindang motor sa Barangay Nagas, Oas, Albay.
Binisto an mga biktimang sinda Bonifacio Osorio, 39-anyos kan Barangay Maramba asin Alex Bausing, 33-anyos kan Barangay Nagas.
Susog sa impormasyon na ipinaabot kan Oas Municipal Police, nakaresibe sinda nin apod gikan sa 911 dapit sa nangyaring aksidente sa nasambitan na lugar.
Nagluluwas sa saindang imbestigasyon na byahe si Osorio pauli sa saiyang harong gikan sa Sitio Imacoto, Barangay Cagmanaba mantang nasa suway na direksyon si Bausing na nagmamaneho man kan saiyang motor.
Pigsasabing kinaon ni Osorio an ibong na linya na nagresulta sa pagkakabanggaan ninda ni Bausing.
Sa kusog kan impact kan banggaan, kritikal an nagin tama kan duwa na tulos man na idinalagan sa Pantao District Hospital alagad ibinalyo sa Bicol Regional Teaching and Traininfg Hospital (BRTTH) alagad parehong binawian nin buhay.
