LEGAZPI CITY—Timbog an duwang lalaki sa ginibong buy-bust operation kan kapulisan sa Barangay Del Carmen, Uson, Masbate.
Binisto an mga suspek na sinda alyas “Matthew”, 27-anyos asin alyas “Ruel”, 28-anyos.
Nakumpiskar sa mga suspek an nagkapirang pakete nin pigtutubudang shabu na may pigkarkulong nasa limang gramo asin may kantidad na P34,000.
Afuera digdi, nakumpiskar man an sarong badil na kalibre .38, mga bala, drug paraphernalia, timbangan, cellphone, motorsiklo, asin iba pang kagamitan na piggagamit sa ilegal na droga, kabale an marked buy-bust money.
Ginibo an operasyon sa pagtatabangan kan Uson Municipal Police Station, Masbate Provincial Police Drug Enforcement Unit-Provincial Intelligence Unit, Regional Police Drug Enforcement Unit 5, 2nd Masbate Provincial Mobile Force Company, 502nd Maneuver Company of the Regional Mobile Force Battalion 5 asin Philippine Drug Enforcement Agency Regional Office 5.
Dinara na an mga naarestar na suspek asin nakumpiskar na ebidensya sa Uson MPS para sa magkakanigong disposisyon asin pagsunad nin kasong pagbalgar sa Republic Act 9165 o Comprehensive Dangerous Drugs Act of 2002, asin Republic Act 10591 o Firearms and Ammunition Regulation Act.
