LEGAZPI CITY — Kritikal ngonian an kamugtakan kan duwang lalaki makalihis na magtigbasan sa Barangay Bulang, Malinao, Albay dara kan pikonan sa inuman.
Binisto an mga biktima na sinda Domingo Bora, 28-anyos asin Alvino Gulgota, 25-anyos na parehong residente kan nasabing lugar.
Sa intrevista kan Bombo Radyo legazpi ki Pol. C/Insp. Arthur Gomez, hepe kan Malinao Municipal Police Station, nag-iinuman sana suboot an duwa asin saro pang amigo kan mangantyaw si Alvino na supot an kainomang si Domingo.
Ibinalik suboot ni Domingo an kantyaw alagad napikon si Alvino na tulos na nagkua nin tabak asin tinigbas an kainuman.
Huli digdi, nagkua man nin tabak an biktima asin binalusan si Alvino.
Segun ki Gomez, padagos pang pig-oobserbaran an kamugtakan kan duwa na nagsapar nin hirarom na mga lugad sa saindang hawak.
