LEGAZPI CITY – Karsel an bagsak kan duwang indibidwal sa ciudad kan Legazpi makalihis na magbayolar sa Anti-Fencing Law.
Segun ki Legazpi City Police Station Chief of Police Police Lieutenant Colonel Domingo Tapel Jr., sa intrevista kan Bombo Radyo Legazpi na binisto an suspetsado na sinda alyas “Bert”, 18 anyos asin si alyas “John”, 20 anyos, parehong warang trabaho asin residente kan naunambitang ciudad.
Basado sa ikinondusir na imbestigasyon kan saindang mga personahes, nag-ugat an isinagibong operasyon makalihis na may magdulok sa saindang ofisina na nahabunan ini nin duwang cellphone.
Sa saindang follow-up, nadakop sa akto an duwang suspetsado na pigpoporbarang ipabakal an duwang hinabon na cellphone na tulos man kinumpirma kan biktima na iyo ini an mga cellphone na piggagamit niya sa pagta-trabaho.
Pigtaram pa kan opisyal na dati nang na-imbwelto an duwa sa manlain-laing reklamo kun sain pirang beses nang nakulong huli sa theft si John sa ibong kan igwa ining probation mantang napapalaya man sana tulos si Bert huli sa saiyang edad kan mga panahon na nadakop ini.
Nagtetenir na sa kustudiya kan saindang hepatura an duwang suspetsado nganing magsa-irarom sa inquest proceeding mantang naghahalat kan magigin commitment order kan korte nganing aramon kun may magkakanigong pyansa an saindang kakahampangon na kaso.
Nagpasalamat man siya sa mga residentes asin opisyales kan Barangay Bitano asin Barangay San Roque huli sa pakikipagtabangan sa mga kapulisan nganing mapugo an ilegal na gawi na nangyayari sa laog kan saindang bisinidad.
