LEGAZPI CITY — Nangenot an duwang drum and bugle corps hale sa provincia kan Albay sa ipigkondusir na Magayon Festival DLC Competition.
Nagpatiribayan an walong grupo sa nasabing kompetisyon kun saen lima an hale sa elementary divsion mantang may tulong grupo sa high school division.
Napano nin kurahaw an Peñaranda Park sa Albay huli sa matinding kaugmahan kan mga nanggarana.
Sa elementary division, nasungkit kan Legazpi Port Golden Phoenix Drum and Lyre Corps an kampeonato mantang sinundan ini kan Polangui Elementary School asin Cabangan Elementary School na hale sa banwaan kan Camalig, Albay.
Segun sa trainor kan nangganang team na si Niko Layosa, labi an saindang kaugmahan asin ‘very honored’ suboot na mairepresenta an syudad nin Legazpi sa nasabing kompetisyon.
Mientras tanto, nagkampeon man sa high school division an Bicol College High School Marching Maroons na sinundan kan Polangui General Comprehensive High School asin Kilicao High School sa banwaan kan Daraga, Albay.
Segun man ki Karlo Mapa kan Marching Maroons, naging worth it an gabos nindang kapagalan kan makua an enot na pwesto.
Segun pa sa duwang naunambitang drum corps trainer, nadifisilan sinda huli sa nataon sa summer vacation an nasabing kompetisyon kun saen nasa kaniya-kaniyang bakasyon an saindang mga estudyante alagad nagibuhan man liwat nin paagi ngane na makapag-train.
Naresibe kan mga nanggana an mga papremyo na 50,000 pesos sa first prize; 40,000 pesos sa second prize asin 30,000 pesos sa third prize winner.
An Magayon DLC Competition an saro sa mga pinaka prestihiyosong drum corps competition sa enterong provincia kan Albay.
