LEGAZPI CITY – Positibo an nagin resulta kan duwang flood control project na ipigtugdok kan duwang magka-ibang contractor sa Barangay Maroroy, Daraga, Albay.
Sa pagsisiyasat kaya kan Bombo Radyo Legazpi news team sa Sumbong sa Pangulo website an mahihiling an sarong proyekto sa nasabing Barangay na natapos kan 2022 sa irarom kan Alphard Primecon Construction bilang contractor na may kantidad na P29.3M mantang an saro man an nakompleto kan 2023 kun sain nagsirbing contractor an Centerways Construction and Development Inc. na may kantidad na P96.4M.
Segun ki Punong Barangay Toto Lubiano sa nagin intrevista kan Bombo Radyo Legazpi na dakulang tabang sa saindang residentes an mga naunambitang proyekto huli ta napupugulan kaini an pagbabaha tuyong nakakamate an banwaan nin makukusog na pag-uuran.
Masasabi niya man na nagamit nin tama an mga pondong pig-alokar para sa proyekto huli ta nagin marhay man an koordinasyon kan Department of Public Works and Highways sa saindang konseho asin residente.
Maugma man suboot an saiyang nasasakupan huli ta dawa papano an nababawasan an sakripisyo nindang tuyong nag-uuran na nagpapahiling na epektibo an proyekto kan gobierno.
Pigtaram pa kan opisyal na sa presente an kompleto na sinda sa mga flood control projects asin dae na malaog sa mga residensya an tubig hale sa mga salog asin an kaipuhan na sana an pagmamantenir na malinig an mga creek asin pagigin responsable kan mga naka-istar harani digdi.
Pagdoon niya man na mas marhay na nagkakaigwa nin public consultation sa mga barangay dapit sa mga itutugdok na mga proyekto nganing maaraman kan mga residentes kun siisay an madadalaganan nganing magibuhan nin magkakanigong solusyon.
Nakiki-olay man si Lubiano sa pagtaraid niyang Barangay na konektado sa mga nasabing proyekto na dae ipag-paanod an saindang mga basura tuyong nag-uuran huli ta sinda an naaapektaran kaini.
