LEGAZPI CITY – Duwang persona an kumpirmadong gadan sa buy bust operation na ipigkondusir kan pinagsarong pwersa kan Masbate City Police Station, Masbate Provincial Public Safety Company (MPPSC) asin Regional Anti-Illegal Drugs (RAID) sa pakikipagtabangan kan Philippine Drug Enforcement Agency.
Nabisto an mga suspek na sinda Joe Santander y Romero, 51-anyos, residente kan Maigo, Lanao Del Norte asin Elmer Orcullo, 40-anyos asin residente kan Brgy. Kinamaligan, Masbate City na parehong bagong naaydentipikaran na drug personalities kan Masbate CPS.
Segun sa impormasyon na naguno kan Bombo Radyo Legazpi, pinabakalan kan mga suspetsado nin plastic sachet nin shabu an police officer na nagserbing poseur buyer kabalyuhan kan P500.
Alagad kan magpabisto an mga ini na pulis, binalo kan mga suspek na paputukan an nasambitan na arresting officer.
Nagsapar nin tama nin bala sinda Santander asin Orcullo asin tulos na idinalagan sa Masbate Provincial Hospital alagad idineklarar na dead on arrival.
Katakod kaini, pighayag ni Police Senior Superintendent Jarry Bearis, Acting Provincial Director Masbate PPO, an nasambitan na mga persona an enot na casualty sa probinsya sa pagpapadagos kan operasyon kan mga pulis kontra iligal na droga.
Mientastanto, padagos man an pangapudan kan Masbate Police Provincial Office sa mga imbwelto sa iligal na droga na ipundo na an saindang bisyo ngani na dae malaag sa peligro an saindang buhay.
