LEGAZPI CITY- Dakulang onra an itinao kan duwang Bicolanong atleta gikan sa Pagasa National High School sa syudad kan Legazpi makalihis na makabulsa nin bulawang medalya sa papatapos nang Palarong Pambansa 2017 sa probinsya kan Antique.
Kasuudma, nagpost sa saiyang social media account si Albay Governor Al Francis Bichara nin pagbati sa duwang Legazpenong gold medalists sa pakawat kun sain binisto an mga ini na sinda Clarence Sarza, grade 11 student para sa event na Taekwondo asin an grade 9 student na si Rafael Siso na nakaguno man nin gold medal sa Arnis.
Sa intribista kan Bombo Radyo Legazpi ki Jeremy Cruz, principal kan nasambitan na eskwelahan, inorgulyo kaini an duwang atleta bilang mga matitibay asin disiplinadong aki bako sana sa lado kan sports kundi siring man sa academics.
Segun ki Cruz, nababalanse kan mga ini an saindang hilig sa sports asin pag-aadal.// Sa katunayan, sarong honor student si Sarza na may labi sa noventa an average na grado.
Pigpapahiling sana suboot kan mga nasambitan na medalists na pig-uutob ninda an motto kan saindang eskwelahan na Onward to Excellence and Character.
Mientrastanto, sinabi ni Cruz na sasabaton ninda sinda Sarza asin Siso nin hero’s welcome bilang pagmidbid sa saindang ipinahiling na tibay sa taunan na pakawat.
Apwera digdi, magkakaigwa man suboot nin motorcade asin selebrasyon para sa nagunong trayumpo kan duwa.
