Ipighayag kan Philippine National Police (PNP) na nagin matoninong an duwang aldaw na transport strike kan Huwebes asin Biyernes, Marso 26 asin 27, katakod kan padagos na paghalangkaw nin presyo kan produktong petrolyo kawsa kan tensyon sa Middle East.
Susog sa PNP, warang nairehistrong major incidents sa mga apektadong lugar, kabale an National Capital Region, Calabarzon, Bicol Region, Central Visayas, Northern Mindanao, asin Cordillera Administrative Region.
Nakapagrehistro an kapulisan nin 33 transport strike activities sa laog kan duwang aldaw, na inantendiran kan kabilogang 1,912 indibidwal.
Nag-deploy and PNP nin mga personahes sa mga pangenot na lugar nganing masierto an kaligtasan asin maayos na bulos kan trapiko, siring man an pagpapaotob nin libreng sakay sa pakikipagtabangan sa mga lokal na gobierno asin partner agencies.
Segun ki PNP Chief Gen. Jose Melencio Nartatez Jr., resulta kan kooperasyon kan publiko asin kahandaan kan mga otoridad an tultol na pagsasagibo nin demonstrasyon.
