Duwang aldaw antes an SONA ni Duterte, pinaglalaoman na magkakaigwa nin mga pagsakyada an mga rebeldeng NPA

LEGAZPI CITY – Naka red alert ngunyan an bilog na pwersa kan militar sa Bicol region katakod kan pinaglalaoman na pagibo nin kadahasan kan mga rebeldeng New People’s Army (NPA) duwang aldaw antes an State of the Nation Address ni Presidente Rodrigo Duterte.
Sa intrevista kan Bombo Radyo Legazpi ki 9th ID Public Affairs Office chief Capt. Randy Llunar, pighayag kaini na na-monitor kan saindang intelligence unit na may planong gibuhong terrorist attack an mga rebelde.
Segun sa opisyal, padagos an preparasyon ninda ngunyan asin an paghihigot kan monitoring sa presensya kan mga NPA ngani na mapugulan an mga ini na makapaghatod nin kariribukan sa rehiyon.
Pinaglalaman suboot na an mga army detachments, military camps asin PNP stations an magigin target kan pagsakyada kan mga kalaban kun kaya ngunyan pa sana puga-puga na an saindang pigigibong preparasyon.
Mientrastanto, inako man ni Llunar na dakulang agyat sa sainda kun papano mamamantenir an katoninongan sa rehiyon urog na ngunyan na sunod-sunod an mga pag-atake kan mga rebelde sa ibang lugar sa nasyon na indikasyon suboot na posible man ining mangyari sa Kabikolan.
Katakod kaini, pighayag kan opisyal na dae sinda pwedesir na mag-relax huli ta mandato ninda na protehiran an publiko asin siyertuhon an seguridad kan mga ini.