LEGAZPI CITY – (UPDATE) Nahahampang na ngunyan sa four counts nin rape an ama kan apat na menor de edad makalihis kaining pauru-utrong lugusan an saiyang mga aki.
Segun sa impormasyon na naguno kan Bombo Radyo Legazpi, napag-araman na nadiskubre an maraot na gibo kan suspek makalihis na magsumbong an 5-anyos na biktima sa sarong empleyado kan Batuhan Elementary School makalihis ining makadulag sa pagbalo na pangmomolestya giraray kan saiyang ama.
Nagluluwas sa imbestigasyon kan kapulisan na pigigibo kan suspek an saiyang pang-aabuso sa mga biktima mantang wara an ina kan mga ini na naga trabaho sa banwaan kan Mandaon sa probinsya kan Masbate.
Napag-araman man na minsan sanang bisitahon kan ina an apat na aki kaini huli ta bako magayon an relasyon nindang mag-agom huli sa pinagkukulugan man suboot ini kan suspek.
Ikinahahandal man ngunyan kan mga otoridad na posibleng bados an 13-anyos asin an 10-anyos na biktima base na man sa pregnancy test na ipigkondusir sa mga ini.
Mientrastanto, nadiskubre man na apwera sa saindang ama, pigmolestya man an 13 asin 10-anyos na biktima kan saindang 50-anyos na tiyuon alagad nakadulag na ini asin pinagsasabing nagpasiring sa Manila.
Pigtatawan sana suboot nin kwarta kan suspek an warang kamuwang-muwang na mga biktima ngani na dae ini magsumbong sa mga magurang.
Sa ibong na lado, napag-araman man na piglugusan man kan ama kan apat na biktima an duwa pa kaining aki sa enot niyang agom.
Sa presente padagos pang nakikipagkoordinar an mga otoridad sa enot na agom kan suspek.
