LEGAZPI CITY – Dead on the spot an duwang indibidwal makalihis an aksidenteng kina-imbweltuhan kan sarong cargo truck asin sarong traysikel sa Barangay Quinastillojan, Tabaco City, Albay.
Segun ki Tabaco City Police Station Public Information Officer Police Staff Sergeant Elaine Adriano sa intrevista kan Bombo Radyo Legazpi na basado sa saindang imbestigasyon na nagluluwas na nawaran nin preno an truck na pigmamaneho ni Domingo Villoso, 46 anyos na residente kan Milaor, Camarines Sur asin nabangga an traysikel na pigmamaneho man ni Arjie Busque, 30 anyos asin residente kan Barangay Buhian kan kaparehong ciudad na may sakay na 4 na pasahero.
Huli suboot sa kusog kan impact an tulos ining ikinagadan ni Busque asin kan sarong pasahero na binistong si Domingo Villanueva Jr., 50 anyos asin residente kan Barangay Comun, Malinao, Albay mantang irido an 3 iba pang pasahero kan traysikel na tulos idinara sa pinakaharaning hospital.
Napag-araman man na kargado an truck nin mga angle bars, plywood, asin iba pang construction supplies pasiring kuta Tabaco proper haleng Ligao alagad kan pigbabaybay na kaini an Barangay Tabiguian, digdi na ini nawaran nin preno sagkod sa makaabot sa Barangay Quinastillojan sagkod sa mabangga kaini an traysikel na nagpundo nganing magsakay sana kuta nin pasahero sa lugar kan pinangyarihan kan insidente.
Pigtaram pa kan opisyal na afuera sa traysikel an may nadamay pang sarong motor alagad sa kagayunan an naka-park sana ini asin warang sakay kan mangyari an aksidente.
Padagos man an imbestigasyon kan saindang ofisina mapadapit sa nangyaring insidente mantang nasa kustodiya na ninda an driver asin pighahalat kun masunad nin kaso an pamilya kan mga biktima.
Pwedesir mahampang an driver kan truck sa kasong reckless imprudence resulting to multiple homicide and multiple physical injuries.
Abiso ni Adriano sa publiko asin mga drivers na magin maingat, magin responsable sa tinampo asin syertuhon na nasa tamang kondisyon an mga behikulo bago magbyahe nganing malikayan an anomang aberya sa kakalsadahan.
