LEGAZPI CITY — Matrayumpo an ikinasang operasyon kan PNP Anti-Cybercrime Group sa banwaan kan Camalig, Albay makalihis na maarestar an duwang suspek na nangikil sa mga biktima.
Segun ki SPO2 Angelo Babagay, Regional Executive Officer, nag-ugat an operasyon sa reklamo kan sarong persona na kun saen kinua suboot kan mga suspek an ladawan kaini, inedit asin ikinaag sa sarong nakahubang ladawan mientras na tinakot an biktima na ipapalakop sa social media an nasabing ladawan kun dae ini matao nin P10,000.
Sa pagkahandal kan biktima, nagtugot ini na makipagtransasyon sa mga suspek mientras na nagtao pa an mga ini nin reference number na tulos na bineripika kan mga otoridad asin na-detect na sa Barangay Aroroy.
Segun ki Babagay, nabasa ninda an pag-oolay kan duwang suspek kan madakop an saro sa mga ini asin inabangan na kan mga ototridad sa harong kan kaibanan na suspek asin duman na ini naarestar.
Matibay suboot an mga suspek sa information technology (IT) kaya madali na makapangbiktima.
Sa ngunyan, dakol pa suboot na pigmo-monitor na kaso an mga otoridad alagad padagos pa ining pigbabantayan asin padagos an pagtipon nin mga ebidensya.
Mientrastanto, inabisuhan man kan opisyal an bubliko na maglikay sa paggamit nin social media asin ibitaran na magtao nin mga ladawan sa dae mga kabisto ngani na dae mabiktima kan mga kawatan.