LEGAZPI CITY — Matrayumpong naikundusir kan mga otoridad an anti-illegal drugs operation na nagresulta sa pagkakaarestar sa magturugang na Del Mundo na mga notorious na drug pusher sa banwaan kan Pio Duran.
Isinagibo kan Pio Duran Drug Enforcement Unit, Provincial Public Safety Company (PPSC), Albay Police Provincial Office (PPO) asin Philippine Drug Enforcement Agency (PDEA) Bicol an implementasyon kan search warrant kontra sa tulong drug suspects na binistong sinda Barangay Kagawad Benny del Mundo, 39-anyos na high value target; Philip del Mundo, 33-anyos; asin si Rommel del Mundo, 37-anyos na gabos residente kan Barangay 3 sa nasambitan na banwaan.
Gabos sinda sinerbehan kan search warrant na inisyu ni Hon Judge Edwin Ma-alat kan Regional Trial Court Branch 14, Ligao City huli sa pagbalgar sa Republic Act 9165 o an Comprehensive Dangerous Drugs Act.
Nakumpiskar sa posisyon ni Benny an anom na selyadong pakete nin pinagtutubudang shabu, tulong nakabukas nang pakete kan parehong droga asin mga drug paraphernalia.
Desi-sais na selyado asin sarong nakabukas na pakete man nin shabu an nakua ki Philip, mga drug paraphernalia, asin sarong pidaso nin nakarolyong marijuana.
Mientrastanto, siyam na paketeng shabu an nakapkap ki Rommel asin mga drug paraphernalia.
Napag-araman na Rank No. 7 sa Provincial Drugs Watchlist si Philip kun kaya ipinagkokonsidirar ining dakulang akomplisyemiento kan Albay PNP.
Sa ngunyan, ipighahanda na an kasong isasangat kontra sa magturugang na suspek.
