LEGAZPI CITY – Nag-abot na sa P9 milyon na mga uncertified products an nakukumpiskar kan Department of Trade and Industry sa inilunsar na mahiwasang inspeksyon sa mga tindahan asin establishimento sa Bicol.
Sa intrevista kan Bombo Radyo Legazpi kay DTI Bicol Consumers Protection head Ruben Sombon, nakumpiska ini sa paglilibot kan Task Force Kalasag sa provincia nin Camarines Sur asin Camarines Norte.
Kadaklan kaini an mga produkto na wara nin magkakanigong dokumentos, dae nag-agi sa inpeksyon, wara nin Philippine Standard Quality asin Safety Mark and Import Commodity Clearance Stickers.
Sa ngunyan dinara na muna kan ahensya an mga nakumpiskar na produkto ngani na dae na maipabakal pa asin magdara nin peligro sa mga konsumidores.
Sa mga masunod na aldaw, nakatalaan pang bisitahon kan task force an mga tindahan asin establishimento de negosyo sa iba pang provincia kan rehiyon.
Pangapudan na kan opisyal sa mga negosyante na magsunod na sana sa mga polisiya na pigpapaotob kan gobyerno ngani na dae makumpiskar an produkto asin matawanan nin penalidad.
Tinawang duon ni Sombon na obheto man sana kaini na mapangatamanan an mga konsumidores na posibleng makabakal kan produkto.
