LEGAZPI CITY – Padagos an pagbabarewas nin tabang kan Department of Social Welfare and Development Bicol sa mga nadanyaran kan shearline na nagdara nin warang patod na pag-uuran sa rehiyon.
An nasabing weather system an nagkawsa nin mga pagbaha asin landslides sa pirang parte kan rehiyon.
Segun ki Department of Social Welfare and Development Bicol Director Norman Laurio sa intrevista kan Bombo Radyo Legazpi na paglaog pa sana kan Enero 2025 an dae na nagpundo an uran kun kaya tulos sindang nagtatabang sa paagi kan augmentation sa mga Gobierno Lokal sa bilog na rehiyon nganing matawan nin food and non food items.
Nagpahayag man nin kahandaan an departamento sa pagtatao nin iba pang pangangaipuhan kan namamanwaan sa panahon na tuminama an ano mang klase kan kalamidad sa rehiyon.
Nakapagbarewas na man sinda nin mga assistance sa mga nadanyaran kan mga pagbabaha sa provincia kan Sorsogon.
Pigtaram pa kan opisyal na gabos suboot na mga provincia sa rehiyon an nagrequest na sa saindang ahensya nganing maabutan kan tabang kan saindang departamento.
Mientrastanto, pasiring na man an saindang team sa Bacacay, Albay nganing magtao nin asistensya sa pamilya kan nagadan na mag-lolang nahulog sa kanal asin inanod kan baha kasuhapon.
Pagirumdom ni Laurio sa mga Bicolano na permihang magmonitro sa kamugtakan kan panahon, magdangog sa mga abiso kan otoridad nin huli ta piggigibo ninda ini nganing malikayan an anumang casualty sa panahon kan kalamidad.
