LEGAZPI CITY – Padagos an pagbabarewas nin tabang kan Department of Social Welfare and Development Bicol sa mga nadanyaran kan mahiwasang kasulo na nangyari sa banwaan kan Pilar, Sorsogon.
Magigirumduman nangapodan nin tabang an labi 300 na mga pamilya sa Barangay Banuyo kan kaparehong banwaan asin provincia makalihis na matumpos nin kalayo an saindang mga kaharongan.
Segun ki Department of Social Welfare and Development Bicol Director Norman Laurio sa intrevista kan Bombo Radyo Legazpi na duwang oras makalihis an kasulo, tulos sindang nagpasiring sa ground zero o an lugar na pinangyarihan kan insidente.
Nakapagbarewas na man sinda nin foodpacks, family kits, hygine kits, sleeping kits, bottled water, modular tents, asin sleeping kits sa mga naapektarang pamilya.
Kaibanan man ninda an mga social workers asin mga personahes kan disaster response and management division nganing makapagtao man nin medical assisstance asin psychosocial intervention.
Pigtaram pa kan opisyal na nakatalaan nindang ibarewas ngonian na aldaw an cash assistance sa lambang household sa paagi kan Assistance to Individuals in Crisis Situations kun sain makakaresibi sinda nin P10,000.
Ini na man suboot an pinakadakulang insidente nin kasulo na natawan ninda nin tabang asin asistensya sa rehiyon bikol para sa presenteng taon.
Perming preparado man an saindang mga family food packs huli ta permihan suboot na pigrarapado an rehiyon nin manlain-laing klase nin kalamidad.
Pagirumdom kaini sa publiko na mag-ingat ngonian kun saen uso an kasulo huli sa labing init kan panahon kasabay man an pagsyerto kaini na nakahanda an saindang departamento sa pagtabang sa ano mang klase nin kalamidad.
