LEGAZPI CITY — Nagmumundo alagad pigrerespeto kan pamayuhan kan Department of Social Welfare and Development (DSWD) sa Bicol an naging rejection kan Commission on Appointments sa appointment ni Judy Taguiwalo bilang sekretaryo kan DWSD.
Segun ki DSWD-Bicol Regional Director Arnel Garcia, namumundo sinda sa naging desiyon kan CA huli sa kun pagbabasehan an naginibuhan kan ad interim appointed secretary, dakol suboot ining nagibo maski sa halipot na oras.
Bako sana suboot ugos o harane si Taguiwalo sa mga pobre kundi maging sa mga empleyado kan ahensya.
May pagmakulog suboot ini sa serbisyo asin pig-iimplementar an mga programa para sa mga pobre.
Alagad sa ibong kan desisyon, sinabi ni Garcia na dae man mapupundo an napunan ng programa kundi idederetso ini asin pag-iibayuhon pa.
Inistorya pa kan opisyal na nasambitan saiya ni Taguiwalo na dae papabayaan an rehiyong Bicol, asin kun ano an plano sa Bicol iyo man an plano para sa nasyun.
Mientras tanto, naglalaom man an ahensya na sa pagbabago kan liderato, mas mapapagayon pa an social protection program para sa mga pobre asin may mauukdan sa bagong liderato.
Pighahanap suboot ninda an may puso na magserbi sa mga pobre, mapaibayo kan mga programa asin magibo nin programa para sa mga ini asin sarong lider na tataong mamayo asin mag-lead.
