LEGAZPI CITY-Posibleng ideklara na an dry season o summer season sa nacion basado sa pagtataya kan State Weather Bureau.
Segun ki Masbate Chief Meteorological Officer Rizza Bartolata, sa intrevista kan Bombo Radyo Legazpi na haros bilog na nacion an nakakaeksperyensya na nin paros hale sa dagat-pasipiko o an pigaapod na easterlies na nakakaapekto ngonian.
Kun kaya posible na maideklara na an dry season sa nacion na padagos na pigmo-monitor kan ahensya.
Huli digdi, mas halabang oras kan mainit na panahon an mamamatean asin may pagbabago sa paros na dating hale sa northeast asin ngonian iyo an easterlies.
Alagad, sinabi ni Bartolata, na posible man liwat na maeksperyensyahan an mauran na panahon, cloudiness, asin localized thunderstorm tuyong hapon sa nagkapirang mga lugar.
Ibig sabihon suboot kaini na mababawasan sana an mga paguuran sa bilog na nacion huli sa epekto kan easterlies.
Afuera kaini, laoman man an halangkaw na lebel kan heat index hasta sa masunod na semana o bulan sagkod sa Hunyo kun sain maeeksperyensyahan an mainit na panahon.
Inaabisuhan man kan opisyal an publiko na posible an danger levels sa bulan na ini mantang magayon an panahon sa pag-outing, alagad pigpapayuhan na dai masyadong magbalad sa aldaw sa oras na alas 10:00 nin pagka-aga hasta alas 3:00 nin pagka-hapon.
Abiso pa kan opisyal na pirmihang mag-inom nin tubig, asin para man sa mga paraooma, ibitaran an pagbalad sa mga nabanggit na oras, siring man na padagos na mag-update sa mga anunsyo kan ahensya.
