LEGAZPI CITY- Nakapagrehistro nin panibagong insidente nin pambabadil sa banwaan kan Daraga, Albay nagkapirang aldaw an nakakalihis kasunod kan nangyaring panggagadan sa radio broadcaster na si Joey Llana.
Ini makalihis mag-alingawngaw an haros magkakasunod na putok nin badil sa tinampong sakop kan Brgy. Bigao sa nasabing banwaan asin madiksubreng nakabulagta mantang dae na naghahangos pa an biktimang binistong si Sherwin Ala, 39-anyos asin drummer kan local band sa provincia.
Sa ekslusibong intrevista kan Bombo Radyo Legazpi ki Brgy. Kagawad Antonio Volante, nakasulot pa nin helmet an biktima kan mahiling mantang nakua man sa may diit sanang distansya an pagsadiring motorsiklo kaini.
Mismong an nasabing opisyal man an nagpaabot kan impormasyon sa Daraga Municipal Police.
Sa suway man na intrevista sa agom kan biktima na si Vangie, ipighatod sana inikan lalaki sa San Vicente Grande National High School kun saen ini nagtutukdo kun kaya labi man an kamunduan asin dagit kan maaraman an nangyari sa esposo.
Mientras tanto, nagkapirang basyo nin bala an nakua sa pinangyarihan kan krimen na pigtutubudang hale sa halabang kalibre nin badil mantang nagpapadagos pa an ipigkokonduktang imbestigasyon kan mga otoridad.
Sa presente, mantenido pang blangko an pagkakabisto kan mga suspek siring man an posibleng motibo sa pambabadil mantang dinara naman an bangkay kan biktima sa punerarya para sa post mortem examination.
