LEGAZPI CITY — Pigkakarkulong maabot sa labi P3 milyong an kantidad kan nakumpiskang shabu sa nadakop na drug personality sa ginibong buy-bust operation sa Barangay Bañag, sa banwaan kan Daraga, Albay.
Binisto an suspek na si Niño Villanueva alyas Nina o Monica, 38-anyos asin tubong Cebu City.
Isinagibo kan Philippine Drug Enforcement Agency (PDEA) Bicol sa pangengenot ni Agent Enrique Lucero an operasyon katabang an Albay Police Provincial Office, Daraga Municipal Police asin iba pang law enforcement agency na nagresulta sa pagkakaarestar sa suspek.
Nakumpiska digdi an poco mas o menos kabangang kilo nin shabu na may street value na P3 milyon, buy-bust money asin iba pang non-drug items.
Sa ngonian, nagtetenir sa kustodiya kan PDEA Bicol an suspek mantang ipighahanda an kasong isasangat kontra digdi.
