LEGAZPI CITY- (Update) Ipigkokonsiderar na dakulang trayumpo kan Philippine Drug Enforcement Agency (PDEA) sa provincia kan Albay an pagkaarestar sa sarong drug personality sa isinagibong buy bust operation sa Brgy. Bañag, sa banwaan kan Daraga.
Kinumpirmar ni PDEA Albay Agent Enrique Lucero sa Bombo Radyo Legazpi na saro si Niño Villanueva, alyas “Nina” o “Monica”, 38-anyos na tubong Cebu City sa mga darakulang illegal drug suppliers sa provincia.
Nakumpiskar digdi an poco mas o menos kabangang kilo kan pigtutubudang shabu na katampad an street value na P3 milyon, buy-bust money asin iba pang non-drug items.
Ipigbuyagyag pa ni Lucero na enot naman na nakulong sa New Bilibid Prison si Villanueva alagad warang koneksyon sa illegal drugs mantang nagpuon sana sa transaksyon sa pagluwas sa karsel.
Dugang pa kan opisyal na hale pa sa NBP an shabu na ipigsusuplay kaini sa mga parokyano sa Legazpi City, Tabaco City asin iba pang lugar sa ikatolong distrito kan Albay.
Sa ibong na lado, piglalaoman na ni Lucero an pagsadsad pa kan suplay kan iligal na droga sa lugar makalihis na maarestar an Rank 8 sa Top 10 Drug Watchlist Target Personalities.
