LEGAZPI CITY – Ipighayag kan hepe kan Daraga Municipal Police Station na nagkaigwa nin koordinasyon an saindang hepatura asin an Philippine Drug Enforcement Agency (PDEA) para sa ipigkondusir na operasyon kasuudma kun sain nasakyada an sarong drug den.
Ini makalihis na nagkapirang semana na pagpapahingalo kan PNP sa mga drug related operations.
Segun ki P/Supt Elcid Roldan, dakol an nakakaabot sa sainda na impormasyon asin reklamo dapit sa pagdakol nanaman kan mga drug personalities sa nasambitan na banwaan.
Dugang pa kan opisyal na magayon an timing kan nagin kooperasyon sa pagultangan ninda kan PDEA ngani dae na maputol an momentum kan programa kan gobyerno dapit sa pagpuho kan problema sa illegal drugs.
Inako man kan hepe na nadifisilan sinda mag-establish nin posisyon huli ta aldaw ginibo an operasyon ngani na mahiling kan mga tawo na pigigibo kan kapulisan an saindang trabaho.
An daga na kinatitindugan kan nasambitan na drug den an nabakal suboot kan sarong Corporal Aldren Castor na dating scout ranger na nahali sa serbisyo asin pina arkilahan sa nagngangaran na Michael Ballarbare.
Dugang pa ni Roldan na narisa ninda an kakaibang istilo kan mga suspek kun sain magin an kisame kaini an igwang mga kandado kun sain pinagtutubudan na digdi pigtatago an mga drug paraphernalia.
Sa presente nagpapadagos pa an ipigkokundusir na imbestigasyon kan mga otoridad dapit sa insidente.
