LEGAZPI CITY- Patong- patong na kaso na may kinaaraman sa iligal na droga an kakahampangon kan apat na persona makalihis na maarestar sa isinagibong buy bust operation kan PDEA Bicol sa Legazpi City.
Kun babalikan, nagsagibo nin buy bust operation an mga personahes kan Philippine Drug Enforcement Agency (PDEA) Bicol katuwang an PDEA Albay, PDEA Legazpi asin Legazpi PNP sa Purok 1, Brgy. 33 Peñaranda, Legazpi City, Albay na nagresulta sa pagkakadakop sa drug maintainer asin 3 bisita kaini sa sarong drug den.
Segun kay Carlo Fernandez, an tagapagtaram kan PDEA Bicol sa intrevista kan Bombo Radyo Legazpi, haloy ng pigmamanmanan kan saindang mga operatiba an drug maintainer kan drug den sa lugar kun saen saro man ining kabale sa regional targeted list na pusher.
Narekober sa nasabing drug den an maabot sa 12 gramo nin shabu na nagkakantidad nin P81,600.
Sa ngunian an nahahampang sa kasong pagbayolar sa RA 9165 o Comprehensive Dangerous Drugs Act of 2002 an mga nasabing suspek para sa magkakanigong desposisyon.
