LEGAZPI CITY – Pabor an kapitan kan Barangay Bitano sa syudad kan Legazpi sa pagbabalik sa kamot kan Philippine National Police (PNP) kan kampanya kontra sa iligal na droga.
Segun ki Kapitan Joel Balinis, mas maray na an PNP na an mamayo liwat sa kampanya ngane na mas maparekas an pagdakop sa mga imbwelto sa iligal na droga.
Nangangapa pa kaya suboot an Philippine Drug Enforcement Agency huli sa dae kaini bisto an mga nasa drug watchlist o an mga ordinaryong durugista.
Kun maibalik na sa PNP, segun ki Balinis, diit na sana suboot an tatrabahuhon kaini huli sa mas bisto na ninda an mga drug personalities asin aram na ninda an mga gigibuhon.
Nagtutubod man an kapitan na sa mga dinakop kan pulis na imbwelto sa droga, warang inosente digdi.
Mientrastanto, aminado man an opisyal na madidifisilang maklarado sa droga an saiyang barangay huli sa madali suboot an pagkondusir nin transaksyon digdi huli sa nasa sentro kun saen madaling nakakalaog an maski sisay na persona.
Alagad positibo man si Balinis na warang magiging imposible kun mas tututukan ini kan barangay.
Nakikipag-kooperar asin nagpapartisipar man suboot an saindang residentes sa mga programa kan PDEA asin PNP kun kaya naglalaom ini na maklarado naman an barangay sa droga.
